တကယ်တော့ ပြင်သစ်ဟာ ရိုမန့် ဘာသာစကားတစ်ခု (Romance) ဖြစ်ပါတယ်။ ရိုမန့်ဆိုတာ ရှေးခေတ် ရိုမန်လူမျိုးတွေရဲ့  (Vulgar Latin) ဗျူဂါလက်တင်ဘာသာစကားကနေ ဆင်းသက်တဲ့ ဘာသာစကားအစုအဖွဲ့ကို ခေါ်တာပါ။ ပင်ရင်းမျိုးနွယ်ဖြစ်တဲ့ အင်ဒိုဥရောပဘာသာစကား မိသားစုထဲက အခွဲ မိသားစု တစ်ခုပါ။  အိုင်တယ်လစ် အခွဲ (Italic branch) ဟုလည်း ခေါ်ပြီး ရိုမန့် ဘာသာစကားအစုအဖွဲ့ထဲမှာ အီတာလျံ၊ ပြင်သစ်၊ စပိန်၊ ပေါ်တူဂီ၊ ရိုမေးနီးယား၊ ကက်တလန် (Catalan) စတဲ့ ဘာသာစကားတွေ အဓိက ပါဝင်ပါတယ်။ အင်္ဂလိပ် ၊ ဂျာမန်၊ ရုရှတို့နဲ့ အခွဲမိသားစု မတူညီပါဘူး။  ရိုမန့်ဘာသာစကား အချင်းချင်းဟာ ဘာသာစကား သဘာဝချင်း အလွန်နီးကပ် ဆင်တူတာမို့ ပြင်သစ်ဘာသာ တတ်ကျွမ်းပါက စပိန်၊ ပေါ်တူဂီစတဲ့ ဘာသာစကားတွေကို သင်ယူဖို့ အလွန်လွယ်ကူသွားမှာ ဖြစ်ပါတယ်။ 

ပြင်သစ်ဘာသာစကားကို အချစ်ဘာသာစကား (Language of Love) ၊ ရိုမန်တစ်ဘာသာစကား (Romantic language)လို့ တစ်ချို့က ပြောကြပါတယ်။ ပြင်သစ်လူမျိုးတွေကိုယ်တိုင်လည်း ဘာအကြောင်းကြောင့် အဲလိုပြောမှန်း သေချာမသိကြပါဘူး။  Sociolinguist တစ်ယောက်ရဲ့ ရှုထောင့်အရတော့ ရှေးအခါက ဥရောပရှိ စစ်သည်တော်တွေအတွက် အချစ်ကဗျာ၊ သီချင်းတွေ ရေးစပ်တဲ့အခါ ရိုမန့်ဘာသာစကားတွေဖြစ်တဲ့ ပြင်သစ်၊ စပိန်၊ ပေါ်တူဂီ၊ အီတာလျံစတဲ့ ဘာသာစကားတွေကို အသုံးပြုခဲ့ကြပြီး ထိုစာပေအဖွဲ့အနွဲ့တွေဟာ ဥရောပနန်းတွင်းအတော်များများမှာ အဖျော်ဖြေ၊ အသုံးတော်ခံ ဖြစ်ခဲ့ကြပါတယ်။ ထို အဖွဲ့အနွဲ့တွေကိုလည်း အားလုံးခြုံပြီး ရိုမန့်လို့ ခေါ်ဝေါ် ခဲ့ကြပါတယ်။ ပြင်သစ်ဘာသာစကားနဲ့ ဆက်စပ်တာကတော့ တခြားဥရောပဘာသာစကားတွေနဲ့ နှိုင်းယှဉ်ပါက အသံထွက် ညင်သာပ‌ြေပြစ်မှု ရှိခြင်း၊ ပြင်သစ်ပြည်ဟာလည်း ကမ္ဘာပေါ်မှာ အလွန်သာယာလှပတာက တစ်ကြောင်း ၊ ဥရောပမှာရော ကမ္ဘာမှာပါ ခံစားမှုအနုပညာနှင့် ပတ်သက်လျှင် ထိပ်ဆုံးက ဉီးဆောင်နိုင်တဲ့ တိုင်းပြည် တစ်ခုဖြစ်နေတာက တစ်ကြောင်း၊ အလှဆုံး၊ အကောင်းဆုံး၊ အရသာအရှိဆုံး ဇိမ်ခံပစ္စည်းပေါင်းစုံ ခံစားနိုင်တဲ့ နေရာတစ်ခု ဖြစ်နေတာက တစ်ကြောင်း၊ တခြား ဥရောပနိုင်ငံများနှင့် နှိုင်းယှဉ်ပါက လူမှုရေးရာကိစ္စများ ပိုမို ပွင့်လင်းလွတ်လပ်တာက တစ်ကြောင်း စတဲ့ အကြောင်းများကြောင့်  တခြား ရိုမန့်အနွယ်ဝင်ဘာသာစကားတွေထက် ပြင်သစ်ကိုမှ ပို၍  နူးညံ့လှပသော ခံစားမှု (သို့) အချစ်နဲ့ သက်ဆိုင်နေတဲ့ ဘာသာစကားတစ်ခု (Romantic language/ language of love) အဖြစ် တင်စားပြောဆိုလာကြတာ ဖြစ်ပါတယ်။ 

ကိုးကား - 

https://www.rocketlanguages.com/blog/the-languages-of-love-the-5-most-romantic-languages

https://www.frenchpod101.com/blog/2010/02/24/history-of-the-french-language-truly-a-romance-language-2/