Bonjour / bɔ̃ˈʒur / ကတော့ ပြင်သစ်တွေရဲ့  အသုံးအများဆုံး  နှုတ်ဆက်စကား ပါပဲ။ မြန်မာလိုဆို မင်္ဂလာပါ ပေါ့လေ။ အဓိပ္ပါယ် အတိအကျကတော့  bon = ကောင်းသော jour = နေ့ ပါ။ နေ့တစ်နေ့ရဲ့ နေရောင်ရှိနေချိန် (အရုဏ်၊ နံနက်၊ နေ့လယ်၊ ညနေခင်း) တွေမှာ လမ်းသွားလမ်းလာ၊ သူငယ်ချင်း၊ မိတ်ဆွေ၊ ဆွေမျိုး၊ လူစိမ်း အကုန်လုံးကို နှုတ်ဆက်တဲ့အခါ ပြောဆိုတဲ့ စကားပါ။ နေဝင်ချိန် (ဆောင်းရာသီဆို ညနေ ၆နာရီလောက် နေဝင်ပြီး အခြားရာသီမှာတော့ ည၈နာရီလောက်မှ နေဝင်ပါတယ်) ရောက်သွားရင်တော့  Bonsoir / bɔ̃ˈswar / လို့ ပြောပါတယ်။  bon = ကောင်းသော soir = ညနေခင်း လို့ အဓိပ္ပါယ် ရပါတယ်။

ပြင်သစ်လူမျိုးတွေရဲ့ နှုတ်ခွန်းဆက် ယဉ်ကျေးမှုမှာ  Bonjour/Bonsoir ပြောခြင်းနဲ့အတူ လက်ဆွဲနှုတ်ဆက်ခြင်း  (သို့) ပါးချင်းအပ်ပြီး အနမ်းပေးခြင်း (faire la bise) ယဉ်ကျေးမှုလည်း ရှိပါတယ်။ လက်ဆွဲနှုတ်ဆက်တာကတော့ မိတ်ဆွေသစ်အချို့နဲ့ မိတ်ဖွဲ့ချိန်မှာ ယောကျာ်းအချင်းချင်းကြား (သို့) မိန်းမအချင်းချင်းကြား (သို့) မိန်းမနှင့် ယောကျာ်းကြား ပြုလုပ်ကြပါတယ်။  ပါးချင်းအပ် အနမ်းပေးခြင်း (la bise) ကို ဆွေမျိုး၊ မိတ်ဆွေ၊ လုပ်ဖော်ကိုင်ဖက်၊ ကလေးသူငယ်များနှင့် ရင်းနှီးခင်မင်သူ အချင်းချင်းကြား ယောကျာ်း/မိန်းမမရွေး ပြုလုပ်လေ့ ရှိပါတယ်။ တစ်ခါတစ်ရံ မိတ်ဆွေသစ်အချို့နဲ့ မိတ်ဆက်ချိန်မှာလည်း ပါးခြင်းအပ် နှုတ်ဆက်ပေးကြပါတယ်။ ဒါပေမယ့် လုပ်ငန်းခွင် အင်တာဗျူး၊ အစည်းအဝေး စတဲ့ လေးနက်လွန်းတဲ့ လုပ်ငန်းခွင် အခြေအနေမျိုးတွေမှာတော့ လက်ဆွဲနှုတ်ဆက်ရုံပဲ ပြုလုပ်လေ့ ရှိပါတယ်။ 

ပါးခြင်းအပ်နှုတ်ဆက်တဲ့အခါ လူနှစ်ယောက်က ခန္ဓာကိုယ်ချင်း မနီးလွန်း မဝေးလွန်း အနေအထားမှာ လက်တစ်ဖက်ချင်းက လက်မောင်းတစ်ဖက်ချင်းကို ကိုင်ပြီး ဘယ်/ညာ ပါးတစ်ဖက်စီကို မထိတထိ အပ်ပြီး နှုတ်ခမ်းမှ အနမ်းပေးသံ ပြုရမှာ ဖြစ်ပါတယ်။ သတိပြုရမှာကတော့ နှုတ်ခမ်းဖြင့်ပါးကို တိုက်ရိုက်မနမ်းမိစေဖို့ပါ။ ပြင်သစ်နိုင်ငံရဲ့ တစ်ချို့ဒေသတွေမှာ ဘယ်/ညာ ပါးတစ်ဖက်စီကို နှစ်ကြိမ်စီနဲ့ စုစုပေါင်း အနမ်း လေးကြိမ်ပေးတဲ့ ဓလေ့ရှိပါတယ်။ တစ်ချို့ဒေသမှာတော့ ဘယ်/ညာ ပါးတစ်ဖက်စီကို တစ်ကြိမ်စီနဲ့ နောက်ထပ် ဘယ်ဖြစ်ဖြစ် ညာဖြစ်ဖြစ် တစ်ကြိမ်၊ စုစုပေါင်း သုံးကြိမ် ပေးတတ်ပါတယ်။ ပါရီနဲ့ ဒေသအတော်များများမှာတော့ ဘယ်/ညာ ပါးတစ်ဖက်စီကို တစ်ကြိမ်စီနဲ့ စုစုပေါင်း နှစ်ကြိမ်ပဲ ပေးကြပါတယ်။ ဘယ်ဖက် နဲ့ ညာဖက်မှာတော့ ညာဖက်ပါးအချင်းချင်း စပြီးနမ်းတာ များပါတယ်။ (အကြံပေးချင်တာကတော့ ပြင်သစ်တွေနဲ့ တွေ့ရင် သူတို့ဘက်က ပြုမူသလို အလိုက်သင့် လုပ်ပေးလိုက်တာ ကောင်းပါတယ်။ Just follow the lead ပေါ့လေ ☺)

Bonjour ⇒ https://www.youtube.com/watch?v=wI5G3fcup5w

ဆောင်ရန် ရှောင်ရန် ➾ https://www.youtube.com/watch?v=d4V0aD2PF14